FELIZ VERÁN E FELICES LECTURAS!!

Rematamos outro curso coa ilusión de sempre e co desexo de que desfrutedes do verán.

Deixámosvos unha guía de lecturas para o tempo de ocio (preme na imaxe para ver).

Ata setembro!!

DÍA DO LIBRO INFANTIL 2025

Dende 1967 celébrase o 2 de abril o Día Internacional do Libro Infantil para conmemorar o nacemento do escritor danés Hans Christian Andersen.

Cada ano, é un país o que patrocina o día e invita a un escritor do país a escribir unha mensaxe para os nenos do mundo e a un ilustrador a deseñar un póster; materiais que se utilizan para promover os libros e a lectura.  

No 2025 ten ese privilexio a sección holandesa a través do texto de Rian Visser e a ilustración de Janneke Ipenburg.

 

No noso cole teremos no expositor da biblioteca unha selección de inesquecibles títulos de contos infantís escritos por Andersen e faremos un mural con ilustracións deses contos feitas polo alumnado.

DÍA DA POESÍA

Como cada ano, dende 1999, celébrase o 21 de marzo o Día Mundial da Poesía para conmemorar unha das formas máis prezadas da expresión e da identidade lingüística da humanidade.

Este día é a ocasión para honrar a poetas, revivir tradicións orais, promover a lectura, a escritura e a ensinanza da poesía. 

Na nosa biblioteca instalamos un estudo de gravación por onde pasen os distintos cursos para elaborar un "podcast poético". Esperamos que o desfrutedes!

DÍA DE ROSALÍA 2025

Cada 23 de febreiro, coincidindo coa data do nacemento de Rosalía de Castro, celébrase o "Día de Rosalía" para recordar e dar a coñecer a figura desta ilustre escritora e poeta galega.

Dende as aulas traballáronse diferentes contidos que podedes atopar no apartado Día de Rosalía deste blog ou premendo en ACTIVIDADES.

Na biblioteca puxemos un expositor recordatorio do "Día" e algúns libros da autora.

Entre todos os cursos do centro elaborouse unha fantástica colaxe cunha imaxe de Rosalía.

MOCHILAS VIAXEIRAS

Estimadas familias:

Comezamos hoxe coa proposta de actividades, para compartir na casa, que enviamos cada curso a través das mochilas viaxeiras: lecturas, música, películas, xogos...

Cada venres unha familia recibirá a mochila para gozar do seu contido ata o xoves seguinte.

Contamos coa vosa implicación e esperamos que actividade sexa do voso agrado.