IV FEIRA DO LIBRO

   Con motivo da conmemoración  do Día Internacional das Bibliotecas Escolares, o pasado venres 25 de outubro organizamos a IV Feira do Libro.

   
  Agradecemos ós nen@s e ás súas familias a súa colaboración para facer que un ano máis esta actividade sexa un éxito.

     

CONTOS SOBRE A IGUALDADE

Tres preciosos álbumes para traballar a igualdade de oportunidades e a coeducación:

A princesa Sabela 

 de Cornelia Funke,

 editado por Xerais.

¿Hai algo más aburrido que ser una princesa rosa? 

de Raquel Díaz , publicado pola Editorial Thule

En ambos casos, as protagonistas, dúas princesas, rompen cos estereotipos sexistas e rebélanse ante a realidade que lles é dada por tradición nos contos. Elas queren ser diferentes: poder subir ás árbores, meter o dedo no nariz,cazar feros dragóns, voar en globo...

A tradición dos contos de fadas, príncipes e princesas desaparece nestas dúas historias, fermosamente ilustradas, que farán as delicias do noso alumnado ao tempo que lles presentamos realidades afastadas dos roles que tradicionalmente lles veñen adxudicando ás mulleres os contos tradicionais.

Rosa Caramelo

 de AdelaTurín

É a historia dunha manada de elefantes e elefantas na que unhas e outros viven de maneira separada e teñen actividades diferentes. Os elefantes son grises, comen herbas verdes,... As elefantas son rosas, non comen herbas verdes,...                                                                                  As elefantas están pechadas nun xardín valado, comendo unhas flores que non lles gustan porque saben mal. Levan zapatiños, babeiros e lazos tamén de cor rosa para volverse máis rosas.                                                                                                                  Os elefantes non levan nada para facerse máis grises, nin comen flores que saben mal. De entre todas as elefantas destaca unha, Margarita, que é de cor gris e por máis que intenta comer as mesmas flores que as súas compañeiras para volverse rosa, non o consegue.                                                                                                   Cando xa se perde a esperanza de que Margarita se volva rosa para que un elefante queira casar con ela, toma a decisión de saír do valado, quitar os seus adornos rosa, e xogar a ser unha elefanta libre igual que os elefantes. a súa iniciativa serve de modelo para que as outras elefantas fagan o mesmo.

10 de decembro DÍA DOS DEREITOS HUMANOS

63 anos despois da súa proclamación, segue sendo necesario lembrar esta data, 10 de decembro, na que a Asamblea Xeral das Nacións Unidas aprobou a Declaración dos Dereitos Humanos.

Necesario porque nin tan sequera nos países que asinaron esta declaración están garantidos estes dereitos en igualdade de condicións para toda a poboación. Non hai máis que botar unha ollada ao noso arredor, asomarse ás noticias.

Mais aínda así cabe pensar que un outro mundo é posible, que hai arrecendos espallados no ar que nos permiten prender unha candea pola esperanza, por estas xeracións, hoxe nen@s, adolescentes, que medran nas nosas aulas, ao abeiro das nosas Bibliotecas -das súas lecturas, da súa información, da súa formación- nen@s e adolescentes que se implican ilusionad@s e con empeño en proxectos coma "Coñecernos para querernos", nun intercambio persoal e de coñecementos con nen@s dos campamentos saharahuis, para quenes a apertura dunha biblioteca con (o Bubisher) ou sen (O Niño do Bubi) rodas, supón moito máis que un mundo de oportunidades. Para acceder á ilusión, aos soños, á formación, ao coñecemento doutras culturas, doutro idioma.

E con esa candea acesa, brincan faíscas que prenden en case un cento de Bibliotecas Escolares Galegas, que por todo o país escollen cada unha un fermoso álbum ilustrado para agasallar a ese recén estreado Niño do Bubi, porque, coma nas nosas propias Bibliotecas, toda inauguración é unha festa. A esa festa que é a lectura, nesas bibliotecas acubilladas na area, queremos enviar estes álbumes como aves portadoras de boa sorte, como bubishers* cheos de cor, imaxes, historias. Porque as nosas bibliotecas, @s nos@s lectores e lectoras, compartimos co Bubisher, cos lectores e lectoras das súas bibliotecas a crenza firme nos Dereitos Humanos, dende o seu 1º artigo: "Tod@s nascemos libres e iguais en dignidade e dereitos"

* O bubisher (Oenanthe leucopyga e Oenanthe leucura) é un paxariño tímido que vive na Península e tamén en África, aquí chamámoslle collalba negra e no Sáhara o seu nome significa paxaro da boa sorte, no dialecto hassaní é Bubchir بوبشير (o da boa nova) porque adoita aniñar e criar despois das choivas, o que quer dicer que medrará a herba, algo moi importante para quen ten gando.

Bubisher é tamén o nome dun autobús-biblioteca que circula entre os campamentos do Sáhara para levar lectura e información. Ou sexa, unha biblio... pero con rodas!!!

Se queredes unirvos á iniciativa de Álbumes para o Bubisher, só tedes que poñer os vosos datos xunto ao resto das Bibes Galegas.

Música e DDHH

Texto de Maribel Serantes (CEIP Os Casais)

Imaxe atopada aquí

SAMAÍN 2011

II FEIRA DO LIBRO